الشاملة بريس صحيفة ورقية والكترونية مستقلة شاملة
قصيدة: “يا وني بيك” للشاعرة سهيلة الريفي المطالسي
الشاملة بريس بالمغرب وأوروبا- بقلم: سهيلة الريفي المطالسي
أنا الشمالية، جايبة لكم هدية..
بديت رحلتي من الشرق..
وانا نشوف ولد بلادي جاي كايتمختر
بقد طويل وطربوش احمر
قلت لهم ويلي ويلي.. ويا ليت لو كان يهضر..!
دزنا على جبال الريف..
الزين والحشمة، عندهم موروثين
قلت لهم إذا كان على هاذ الحكام اللي فيه.. نحشم نقول ليه كلمة: أو نهز عيني فيه..!
دخلنا الحد الاثنين..
دݣينا الوتاد في ساعة اليتيم
قلت لهم واش هذا اللي قالوا عليه الحنين
أو لا أنا غير روح، وما عندي رجلين..؟!
كملناها للثلاث والحد السوالم..
بان ليَّ بالنخوة.. غادي ويسلم
سرج عوده، وهز جلوده، وخلاني وراه نقول في القافية..!
وقفنا في مكناس.. احدى الباب الكبير
جاوا سولونا ناس.. أصلهم من أهل زعير
قلنا لهم الله يتمم بالخير
واشكون هذاك اللي حط عينه عليَّ..؟!
وصلنا للبيضا.. لقيناها وحيدة
حبينا نريحوا، قالوا لنا في الجديدة
والحبيب المنين، المذبل العينين
نهار وما طال.. وانا نقلب بلا عوين..!
بانت لينا الحمرا، بنخالها الخضرا
ومن كثرت اللون.. اللي دوخني بيه
بقيت غاديا تالفة، وانا هايمة بيه..!
قلنا نباتوا في أغادير..
حتى سولنا عليه الكبير والصغير
شوية وهو يجي.. بهمة وشهامة
قلت لهم شدوني شدوني.. يمكن غادي نطيح..!
أذن الفجر، على راس الحجر، مقابل البحر
هزينا الغلة، من أوفلا
وكملنا طريقنا.. للأبية…..
على غفلة شفنا.. حتى تفاجئنا
والله هي: باب الصحراء هي
القوة والمتانة، واللطافة والكرامة
يقول في المعاني، والكلام الرزين
نطلق عليه سوالفي..
وما نروح وانخليه..!
ما قدنا اليوم وطوله..
قلنا مازال نرجعوا وانجولوا
الخير والخمير نتمشاوا فيه
لآخر نقطة.. في بلاد الرزق الوفير
والبركة والتيسير.
“ويا وني بيك..!’
