قصيدة “عيد العرش المجيد” للكاتب الشاعر محمد لمليجي

الشاملة بريس- بقلم: الكاتب والشاعر / محمد لمليجي

هادي فرحة ،ما بحالها فرحة، راه اليوم أحسن عيد

عيد العرش، عيد البيعة، والولاء لسيدنا، مليكنا لمجيد

كل عام يطل علينا هاد العيد ،ويخلي قلب الشعب سعيد

ينور لمكان بأنوارو، ويزين سمانا،بضي أجديد

وبأصواتنا نردوا ونقولوا، عاش مليكنا احبيب القريب ولبعيد

محمد السادس تاج راسنا، تحفظوا لينا ياربي، وفي عمرو بارك وازيد

واحفظ الاسرة العلوية، وخلي صيتها عالي ،وانصرها ياربي واعطيها عمر أمديد

راه اليوم مغريبنا، فرحان بمحبة مليكنا، قائيدنا، مول الحكمة والرأي أسديد

و تاريخ بلادي، اليوم يشهد بامجاد كثيرة، و بمداد الفخر، يدون انتصارنا لفريد

ويقول ويردد، أحنا لمغاربة ،رجال ونسا، سايرين وراء سيدنا بلا شرط وبلا تقييد

والبيعة و الولاء ، عهد دايم ، محافظين عليه، والله علينا خير شهيد

وبعيد العرش، اليوم الصحرا، جات برمالها، وجمالها، وغنات، غناها الحساني وتعيد

وكل لمدون تهتف فرحانة، وتردد بقلوب صافية أجمل نشيد

وشعارنا الخالد، رمز الوحدة، الله الوطن، الملك، يستاهل منا غير الترديد

يا بلادي اسعدي اليوم وزيدي سعدي، اعطاك الله مليك أعظيم حبو ليك امتين واشديد

الله يبارك في عمر سيدي، محمد السادس ،امير المؤمنين، فخر المغريب، وفخر العرش لمجيد 

منصور، يا سيدي، واحنا خدام لعرشك، والوطنية هي لباسنا، بلا تغيير ولا تجديد

ورجانا في الله أكثير، يالي انت محبوب عند لكبير وأصغير، يدوم عرشك في كل عيد وعيد