الشاملة بريس صحيفة ورقية والكترونية مستقلة شاملة
الشاملة بريس- بقلم الشاعر والكاتب محمد لمليجي فرنسا
فراقك يا أمي زروالة
فراقك يا أمي زروالة ماكان علبال،
جانا على بغتة واشحال كان اصعيب
بغيابك يا لميمة زارنا لهبال
وبكى عليك لبعيد والقريب
جات الموت وداتك في الحال
وألمات عليك كل غالي واحبيب
كل واحد فينا يعزك من هادي اشحال
أمٍي زروالة، لي قصدك ماكان يخيب
كنت أم احنينة فيك العمة والخال
وتداوي لجروح بحال الطبيب
باب دارك كان مفتوح ومازال، وكنتي
أترحبي بكل واحد، وحتى لغريب
ما تفرقي بين النسا ولا بين الرجال
عندك كولشي عزيز،وانتي ماشي مولات العيب
وكل لوليدات عندك بحال بحال
قلبك صافي وابيض تعدى لحليب
في سيدي قاسم حروش كلشي قال
بلي انتي أم غالية وفراقك اصعيب
وسيدي سليمان عندهم راكي فالبال
خليتي ناسها على فراقك ما تصيب
وراه اليوم قلوبنا مالها تبدال
على محبتك والله علينا رقيب
هو ربي لكريم لعظيم، المتعال
يرحمك وينعمك بريحة الطيب
ويصبًر عليك ناسك بصبر لجبال
يا أمٍي زروالة يا حبيبة كل احبيب
وعلى قبرك كولشي يسول ويسال
ويدعي بالرحمة ليك، والله هو المستجيب
