الشاملة بريس صحيفة ورقية والكترونية مستقلة شاملة
الشاملة بريس- بقلم: الشاعر والكاتب محمد لمليجي فرنسا
“خويا لعزيز عليا”
هو خويا ماشي من امي وبويا
غالي وعزيز وهو اكثر من خويا
كان ديما قريب لخويا امحمد لكبير
ما يتفارقو بجوج مهما كان يصير
وانا كان ليا رفيق فدرب حياتي
وخاوتنا قوية في الماضي والآتي
كان معانا في دارنا باولاد احميد
وبويا مافرق بينا وخلاه سعيد
وصًانا كثير عليه ومافرطنا فيه
وخا ليام خلات كل واحد فجيه
ورغم لبعاد خاوتنا مازالت متينة
ما تغيرها ايام وهذا لي تمنينا
خويا عبد السلام راك ولد بلادي
وانت لعزيز عليا ياعم أولادي
نطلب ربي يحفظك طول الدوام
ونعيشو مع بعضنا ما بقى مليام
وروح بويا ترضى على خاوتنا
وتدوم لمحبة وتزيان بيها لَمتْنا
ونحييو ليام في سيدي سليمان
مع خوتنا واحبابنا ودوك الجيران
لي عشنا معاهم احلى الذكريات
كان فيها غير الصدق فكل لوقات
واليوم راني نطلب رب العالمين
نبقاو خاوة على طول السنين
ويحفظك لينا ياخويا عبد السلام
يالي لحديت عليك يفوق لكلام
راك ديما فلبال كل ساعة وحين
ما ننساك يا لعزيز يا خويا لحنين
