الشاملة بريس صحيفة ورقية والكترونية مستقلة شاملة
الشاملة بريس- بقلم: الشاعر والكاتب محمد لمليجي فرنسا
شهر رمضان
بالفرحة جانا شهر رمضان
شهر جليل بالعبادة هو عنوان
نتسناوه بكل حب واطمئنان
فيه الخير والبركة من الرحمان
هو شهر فضيل لكل انسان
نسعدو بصيامو ونسعاو الغفران
بيه كتابنا يتحسن ويزيان
بالنية الصافية وقوة الإيمان
و نتواصلو مع لحباب ولعشران
ونتسامحوا مع لعزاز فكل مكان
صلة الرحم تزيد في الميزان
وتخلي القلب لحزين فرحان
هذا شهر الحسنات مذكور فلقرآن
والأجر فيه يتضاعف بلا تمان
و لازمنا نصليو على نبينا العدنان
شفيع الأمة، عظيم الجاه والشان
وسلامنا عليه واجب بلا نقصان
هو حبيب المولى، الحنًان المنان
وربي لكريم عظًم، شهر رمضان
بليلة القدر لي نديروها فلحسبان
ليلة ماتشبه الشهور فكل ازمان
فاقت المسك الغالي والريحان
ياشهر رمضان ياتقوى كل إنسان
تعود علينا بالخير وراحة الابدان
انت أحسن ضيف في كل امكان
انت حبيبنا وحبيب كل الصبيان
قدومك يبعد علينا گاع لحزان
ويضوي طريق كل واحد غفلان
بيك لرواح تتنقى وتحس بالأمان
طامعة في رضاة الرؤوف الرحمان
